...shpejt dhe ndryshe...

Dy institucionet kryesore në Kosovë, Qeveria e Kosovës dhe Zyra e Presidentit të Kosovës, kanë gënjyer publikisht kur kanë thënë se këngëtarja kosovare me famë botërore, Rita Ora do të mbajë koncert në Prishtinë, me rastin e festimit të 10 vjetorit të Pavarësisë së Kosovës.

Por, lajmi ende nuk është konfirmuar zyrtarisht në faqen zyrtare të saj.

Të premten, Adil Behramaj këshilltari i presidentit Hashim Thaçi tha se ardhja e këngëtares Rita Ora në Kosovë tashmë është e konfirmuar dhe se me ekipin e ylllit botëror tashmë janë vetëm duke u dakorduar për detajet e koncertit.

“Po, tashmë e kemi të konfirmuar ardhjen e Rita Orës në Prishtinë. Aktualisht jemi duke u koordinuar me ekipin e këngëtares rreth koncertit që do ta mbajë më 17 Shkurt”, ka deklaruar Behramaj për “Telegrafin”.

Madje Zyra e Presidentit Thaçi përmendi edhe orën se kur do të fillojë koncerti i Rita Orës, duke aluduar në orën 22:00.

E një ditë para tij, Jetlir Zyberaj, këshilltar i zëvendëskryeministrit dhe minsitrit të Jashtëm, Behgjet Pacolli, i tha portalit “Lajmi” se Rita Ora do të vijë me aeroplanin privat të Pacollit.

“Rita Ora do të vije në Kosovë për nder të 10 vjetorit të Pavarësisë. Jemi dakorduar që ajo do të vijë me avionin privat të zotit Pacolli. Pra zoti Pacolli i ka ofruar mundësinë që të vije me avionin e tij pasi që ajo është ambasadore e Kosovës që përfaqëson vendin më së miri nëpër botë”, ka thënë ai.

Por të dyja këto “konfirime” të Qeverisë dhe Presidencës i ka mohuar vet agjenti i Rita Orës, Sol Parker nga “Coda Agency” nën menaxhimin e së cilës është këngëtarja e njohur.

“Jo mesa e di unë. Ajo nuk do të performojë”, ka thënë Parker përmes emailit të tij, që ia ka dërguar Insajderit.

Ai ka treguar se në datën 17 shkurt, Rita Ora është e angazhuar në një aktivitet të një reklame në Japoni, por që nuk e ka asnjë konfirmim për të perfomuar në Kosovë.

Këtë e ka kundërshtuar këshilltari i zëvëndëskryeminsitrit dhe ministrit të Punëve të Jashtme, Behgjet Pacolli, Naim Murseli, i cili e ka përgënjeshtruar agjentin zyrtar të këngëtares Rita Ora, Sol Parker, i cili tha se nuk është i konfirmuar koncerti i saj në Prishtinë me 17 shkurt, për nder të 10 vjetorit të Pavarësisë.

“Rita Ora do të vjen, dhe është e konfirmuar 100%. Madje edhe nga babai i saj”, ka thënë Murseli.